Vardar ke Testira Crnogorci

Еден десен страничен фудбалер со офанзивни задачи, од Могрен, и играч за врска од Сутјеска, треба да допатуваат во Скопје, на проба во Вардар. Од клубот не ги откриваат нивните имиња за да не се расипел евентуалниот трансфер. „Црвено-црните“ повторно ќе се обидат да се договорат со капитенот на Напредак Крушевац, Предраг Павловиќ, по неуспешните преговори пред едно лето. Засега потврдено е дека во Вардар на шестмесечна позајмица ќе дојде 21-годишниот Томислав Пајовиќ од Партизан. Неговите клупски колеги Милан Перендија и Остоја Стјепановиќ ќе го носат „црвено-црниот дрес“ најмалку уште шест месеци, откако зимоска дојдоа во Скопје како позајмени играчи.

Вардар ќе го спречи заминувањето на голманот Јорде Георгиевски, кој според челниците на клубот, треба да одработи уште шест месеци од договорот, склучен зимоска. Георгиевски има понуда од Славен Белупо да го замени Јане Николоски, нашиот репрезентативец и нов член на Макаби Херцлија. Од клубот велат дека не се заинтересирани за ниту еден од фудбалерите од Работнички К., кои добија одврзани раце. „Црвено-црните“ размислувале за ангажман на дефанзивецот Менде Степановски, но отштетата од 30 илјади евра според нив е превисока. Во спротивен правец, кај соседите ќе замине заменик-капитенот на „црвено-црните“, Ертан Демири (28), но само во случај ако не најде ангажман во странство. Играчот од средниот ред има понуди од прволигашки екипи од Швајцарија и од неколку француски второлигаши

Вардар тргнува без засилувања

Без засилувања во првата фаза од подготовките, денеска од 17 часот Вардар ќе стартува со тренинзите пред почетокот на новата сезона. Од клубот си замина Ертан Демири, кој му се приклучи на лутиот ривал Работнички Кометал. Во тек се преговорите со 21-годишниот одбранбен играч на Партизан, Томислав Пајовиќ, а од клубот најавија ангажман уште најмалку на тројца фудбалери. Еден од нив веројатно ќе биде голманот Љупчо Кметовски, кој го напушти новиот прволигаш Милано. Ако се договори со челниците на „црвено-црните“, Кметовски ќе се врати во Вардар за да го замени Јорде Георгиевски, кој ја одби и втората понуда да остане уште една година. И преостанатите две најавени засилувања се од македонските клубови, првичните разговори се завршени, но од Вардар одлучија да не ги објавуваат имињата додека не се заврши работата.

- Договорот со нив е во финална фаза, а ако успееме да ги ангажираме, ќе ни се приклучат во Охрид. Од задутре на тренинзите во Скопје треба да се појават и Бразилците Вандеир, Брага и Де Франка, заедно со кондицискиот тренер Леонаш да Переира Чита - велат од клубот.

Токму македонскиот туристички бисер Охрид ќе биде домаќин на Вардар од понеделник. „Црвено-црните“ таму ќе ја одработат втората фаза, што ќе трае 12-14 дена. Потоа актуелниот освојувач на Купот ќе игра најмалку две пријателски средби во Бугарија или во Србија, пред почетокот на натпреварите во УЕФА-купот на 19 јули. Ждрепката за 1. квалификациско коло од најмасовното клупско натпреварување ќе се одржи на 29 јуни во Нион, Швајцарија, а Вардар не е во групата на носители