* "За да бидеме комплетни на првиот собир, се договоривме за 2-3 дена да ја одложиме прозивката", рече Канатларовски.
Место в сабота, првата прозивка за подготовките на новата сезона на нашиот најтрофеен клуб Вардар ќе се случи 2-3 дена подоцна. Шефот на стручниот штаб, Драган Канатларовски, мораше да се реши на ваков чекор поради тоа што повеќемина фудбалери го најавиле своето задоцнување на првиот собир.
"За да не бидеме само половина екипа на првиот тренинг, се решивме да ја пролонгираме прозивката", истакна Канатларовски, кој дополнува:
"Повеќето фудбалери најавија дека ќе задоцнат, па токму од тука за да ја имаме целата екипа на располагање ќе се собереме подоцна. Најверојатно тоа ќе биде во вторник. Бразилците најавија дека ќе пристигнат на 19 јуни, а на истиот ден се најавија уште четворица фудбалери. Три дена подоцна нема да претставуваат проблем", изјави популарниот Цапар.
Веќе се знае и каде ќе се одвиваат подготовките на екипата за претстојната сезона во која нашиот најтрофеен клуб ќе атакува на двете титули.
"Првиот дел од подготовките ќе го поминеме во Скопје, а потоа заминуваме во Охрид. Како можна алтернатива тука ни е Маврово. Многу е важно добро да се подготвиме, а ќе мора да закажеме и пријателски натпревари со квалитетни противници со цел што поподготвени да ги дочекаме прво натпреварите во Купот на УЕФА а потоа и во првенството", заврши Канатларовски.
Фудбалерите на актуелниот освојувач на Купот се на заслужен одмор, а раководството веќе работи на новите засилувања во екипата. Ќе мора да се бара замена за Кировски, кој веќе е пред трансфер во рускиот тим Амкар. Се преговара и со неколку фудбалери кои првите луѓе сакаат да ги задржат во своите редови и за наредната година. Ертан Демири, Јорде Георгиевски, Владимир Секуловски се само дел од фудбалерите кои Вардар со сите сили се обидува да ги сочува во своите редови за настапите во Купот на УЕФА, како и за следната сезона
Предмет: Prolongirana Prvata Prozivka 
Сре Јун 13, 2007 5:23 pm