Atak na Dvojnata Kruna

Атак на двојната круна
РАБОТНИЧКИ К ВЧЕРА СО ПРОЗИВКАТА СТАРТУВАШЕ СО ЛЕТНИТЕ ПОДГОТОВКИ

*"Ние како клуб имаме намера во идната сезона да атакуваме на двојната круна" потенцираше стратегот Драгољуб Беквалац

* Првиот тренинг го "одработија" само 12 играчи, меѓу нив беа и новакот Демири и повратникот Лазаревски, оправдано отсутни беа Игњатов, Неџипи, Карчев и Маџовски

Тргна Работнички К со летните подготовки. Вчера точно во 10 часот со првата прозивка а потоа и со првиот тренинг "романтичарите" стартуваа со подготовките а наредната сезона во која како и обично во последните неколку сезони "влегуваат" со големи амбиции. Но како ретко досега стратегот Драгољуб Беквалац имаше на првиот тренинг на располагање само 12 фудбалери. Познато е дека "ремонтот" одамна е направен, досега си заминаа единаесетмина а има и нови имиња. Сепак вчера стартуваа само Томе Пачовски, Марко Јовановски, Мирослав Вајс, Аделунде Дабатунде Лукман, Бојан Михајловиќ, Иван Пејчиќ, Баже Илијоски, Немања Милисављевиќ, Иван Тричковски, Крсте Велкоски, новакот Ертан Демири и повратникот Димитрија Лазаревски. Никола Карчев (викендов стапи во брак и имаше свадбена веселба), Филип Маџовски, Стојан Игњатов и Ндерим Неџипи од различни причини ќе задоцнат неколку дена.

По состанокот во соблекувалната и извршената прозивка фудбалерите заедно со помошниците на Беквалац, Жикица Тасевски, Зоран Ѓурѓевиќ и Мане Манев имаа 45 минутен џогинг на кејот на Вардар.

"Започнуваме онака како што и планиравме. Во Скопје ќе бидеме до 24 јуни за кога е закажано заминување на Тара (Србија), каде што ќе одиграме најмалку четири контролни натпревари Досега закажани се средбите со Војводина и Зета. Таму остануваме до 9 јули а до 19 истиот месец кога ја играме првата средба во квалификациите во Купот на УЕФА ќе работиме во Скопје. Инаку амбициите на Работнички К не се нови. Ние како клуб имаме намера и во оваа сезона да целиме кон највисоките дострели. Имаме намера што подобро да се претставиме во фудбалска Европа а на домашна сцена атакуваме на двојната круна на задоволство на нашите најверни навивачи. Познато е дека во нашата екипа се случи целосен 'ремонт'. Си заминаа единаесетмина а ќе се обидеме да доведеме адекватни засилувања. Велам засилувања а не нови имиња. Засега има двајца нови играчи, ќе има уште неколкумина, значи селекцијата не е завршена. Ќе се обидеме да создадеме поквалитетен тим од лани и со тоа да ги оствариме нашите амбиции

Се чека на Јанчевски, Беќири, Мојсов, Османи...

Беквалац не крие дека покрај Демири и Лазаревски клубот планира уште најмалку четири нови имиња од нашата Прва лига во неговиот тим. Едни од оние кои во моментов се преговара се Бобан Јанчевски, Арѓент Беќири (Ренова), Ѓорѓи Мојсов (Пелистер), а според Беквалац тој го преферира младиот играч за врска на Ренова Минас Османи. Според него Османи има квалитет да игра во Работнички К.

Беквалац ја одбил Војводина

"Јас ја преземам дел од вината што Работнички К не успеа да ја освои третата титула. Токму затоа мојот мотив да работам тука во иднина е уште поголем. Само за ваша информација јас официјално ја одбив отворената понуда на Војводина за местото шеф на стручниот штаб. Имаше и некои други понуди но тие не беа толку конкретни каква што беше онаа од новосаѓаните. Но, претходно се договорив за соработка со раководството на Работнички К и имам намера да ги предводам 'романтичарите' и во оваа сезона дополни Беквалац.

И Мегленски бил во "игра"Неофицијално дознаваме дека најдобриот фудбалер на Победа и капитен Тони Мегленски имало шанса да потпише за Работнички К. Преговори имало но сепак Мегленски како што веќе е познато се решил да ја прифати понудата од хрватскиот прволигаш Меѓимурје од Чаковец. Инаку како што напомена Беквалац има намера во деновите што претстојат да доведе петмина квалитетни играчи од Србија. Сиите тие би имале квалитет веднаш да заиграат во првиот тим. Со нив и со Михајловиќ, Пејчиќ, Милисављевиќ и Лукман тогаш бројот на странците би бил девет