Kirovski Ke Se Razbudime za Anorthosis Famagusta FC

Кировски: "Ќе се разбудиме за Анортозис..."

ВАРДАР НА РЕЗУЛТАТСКИ ПЛАН ЛОШО ГИ МИНА ПОДГОТОВКИТЕ ВО ОХРИД

"Лошите резултати на подготовките не мора ништо да значат, иако мора да се признае дека потфрливме", вели напаѓачот на Вардар

"Црвено-црните", што се однесува барем на резултатски план, катастрофално лошо ги минаа подготовките покрај охридското крајбрежје во пресрет на првиот натпревар од 1. квалификациско коло кој на 19 јули на "Градски" го играат против кипарскиот Анортозис.

Забележана само една победа, еден нерешен резултат и три порази со постигнати вкупно пет голови во петте пријателски натпревари. Крајно неочекувани резултати од Охрид за црвено-црниот табор...

"Точно е. Навистина не очекувавме вакви резултати за време на подготовките", вели напаѓачот на "вардарците", Христијан Кировски. "И лично мислам дека одлично како тим одигравме во пролетнава сезона па воопшто не очекував вакво нешто. Потфрливме комплетно, па и ние од нападот во реализацијата. Меѓутоа, овие резултати не мора ништо да значат. Да ги оставиме овие игри за 'тест' средбите, а на официјалните натпревари сигурен сум дека ќе биде многу подобро. Ќе се разбудиме веќе за дуелот со Анортозис во Купот на УЕФА".

Кировски до јануари 2007 настапуваше токму во кипарскиот шампионат. Знае дека "вардарците" ги очекува силен противник, но никој не размислува предвреме да се предаде

"Милионскиот буџет на Анортозис доволно зборува за тимот. Полјакот Сосин е екстра напаѓач, а и поранешниот мој соиграч од Етникос Ахна, Милан Белиќ, е одличен фудбалер. Значи, ги знаеме нивните квалитети, но ги знаеме и нашите. Мора храбро да пристапиме во меѓусебната пресметка".

Првиот натпревар го играме пред домашната публика, а потоа н$ очекува пеколно гостување.

"Дефинитивно нашата шанса е во Скопје. Треба да не примиме гол, а секоја победа, па и од 1:0, ќе ни биде и тоа како предност пред реваншот на кој н$ очекува пеколна атмосфера. Анортозис на домашен терен секогаш, без разлика за каков натпревар станува збор, го следат 15.000 навивачи. Но и ние во Скопје ќе ги имаме нашите 'Комити' со чија помош сигурен сум дека може да дојдеме до триумф", истакнува Кировски

ПОДГОТВИТЕЛЕН ПЕРИОД
ВАРДАР - Тирана (Алб) 0:1

ВАРДАР - Беса (Алб) 0:0

ВАРДАР - Охрид 3:0

ВАРДАР - Тирана (Алб) 2:4

ВАРДАР - Силекс 0:1

Посериозна повреда на Костовски

Двајцата вардарови напаѓачи Христијан Кировски и Јован Костовски заработија повреди на последниот контролен натпревар со Силекс. Според вчерашните информации, нешто посериозна е повредата на Костовски, кој има повреда на зглобот и деновиве ќе биде познато дали ќе паузира, додека Кировски сигурно ќе биде подготвен за дуелот во Купот на УЕФА.

"Денеска треба да направам уште една снимка, меѓутоа мислам дека ќе бидам подготвен за четврток", вели Кировски.

И Кипраните со само една "тест" победа

Контролниот натпревар со кипарскиот вицешампион Омонија, кој заврши без победник (1:1), беше петтата и последна "тест" средба на Анортозис пред натпреварот со Вардар. Но, како и нашиот најтрофеен клуб, Анортозис не може да се пофали со добри резултати за време на подготовките. Имаат една победа, два нерешени резултати и два порази, меѓутоа нивниот тренер Грузиецот Тимур Кецбаја, како што вели самиот, воопшто не го загрижуваат резултатите.

Кипраните двонеделните подготовки ги реализираа во Холандија, каде одиграа четири пријателски натпревари. Ремизираа со белгискиот прволигаш Ст. Труден (2:2), го совладаа романскиот прволигаш Чеалул (2:0), а загубија од белгискиот Монс (1:2) и израелскиот Беитар Ерусалим (0:1).